Ben Senin Hayranınam

Şâh-ı hûbânım efendim ben senin hayrânınam Saklaram ‘aşkın gönülde ‘âşık-ı nâlânınam Pâs-bân-ı bâbın’am hem sâ’il-i ihsânınam Bî-nevâyam bî-nevâyam cân ile giryânınam Cân-fedâyam âsitânında kulun kurbânınam ‘Âşık-ı dîdâr-ı yâram hâk ile yeksânınam Halk içinde ahkar oldum kemter oldum efkârım Kâle-i nâmûsum aldın şerm-sârım ahkarım İ ‘tibârım iftihârım bâd’a virdin kemterim Râzıyam ammâ revâ mı döndüre yüz dilberim Cân-fedâyam âsitânında kulun kurbânınam ‘Âşık-ı dîdâr-ı yâram hâk ile yeksânınam Ser kodum sırran ve cehren âsitâna zâr ile Arz-ı ahvâl eyledim yüz bin recâ izhâr ile Gelmedim insâfa bir an merhamet îsâr ile Dönmezem kılsan cefâlar zulm-i âteş-bâr ile Cân-fedâyam âsitânında kulun kurbânınam ‘Âşık-ı dîdâr-ı yâram hâk ile yeksânınam Sînemi sad-çâk idüp bin derde dûçâr eyledin Tîg-i cevr ile beni mecruh u bîmâr eyledin Rûz u şeb cismim nişân-ı seng-i ağyâr eyledin Tâ kıyâmet kahr ile mahrum-ı dîdâr eyledin Cân-fedâyam âsitânında kulun kurbânınam Âşık-ı dîdâr-ı yâram hâk ile yeksânınam Çeşm-i fettânınla meftun eyledin cânâ beni Aşk u şevkinle fenâ itdim dil-ü cân-u teni Hâlime rahm eyler idin n’oldı ol hâlet kani Hazret-i Allah’a âh ettim havale ben seni Cân-fedâyam âsitânında kulun kurbânınam Âşık-ı dîdâr-ı yâram hâk ile yeksânınam Ey şeh-i ‘âlî-kerem bilmem ki taksîrim nedir Afv’a nâ-şâyeste cânâ sû’-i tedbîrim nedir Söyle şâhım hışm ile bâdî-i tekdîrim nedir Nişledim nitdim ‘azîzim vasla te’hîrim nedir Cân-fedâyam âsitânında kulun kurbânınam Âşık-ı dîdâr-ı yâram hâk ile yeksânınam Bende-i ‘aşkım ezelden elde yokdur ihtiyâr Gayri turmaz bu Ğulâmî inler ağlar zâr zâr Şerm-sârım rûy-ı yâre bakmağa yok iktidar Yüz çevirmem cevr den itmem recâyı iktisâr Cân-fedâyam âsitânında kulun kurbânınam ‘Âşık-ı dîdâr-ı yâram hâk ile yeksânınam