Ey Gönül Bezmi Muhabbetde

Ey gönül bezm-i muhabbetde dilersen câm-ı Hû ‘Aşk ile baş ayağı olmağa feyz-âşâm-ı Hû Bu hüviyyetdir ki sârîdir cihâna ser-te-ser Sanma ancak söylenir ‘âlem dilinde nâm-ı Hû Mantıku’t-tayrı Süleymân olmayan fehm eylemez Remzi bilmez gerçi murg u mûr ider îhâm-ı Hû Sofradır ‘âlem anın sahnında esmâ mâide Herkese ismin elinden irişir in’âm-ı Hû Şem’-i cânın cânib-i gaybu’l-guyûba tut seher Tâ ki vâsıl ola ey Hakkı sana peygâm-ı Hû