Feyzi İlahiden

Gel ey sâhib-me’ânî gör nazar feyz-i ilâhîden Kulak tut cân ile dinle haber feyz-i ilâhîden Musaffâdır bugün kalbim dü ‘âlem mâcerâsından Gönül bir şey’e zamm olsa keser feyz-i ilâhîden Eğer sen ‘ilmin istersen hakîkat tevhîd-i zâtın Gözün aç kıl nazar gör ne doğar feyz-i ilâhîden Temâmet anı zikr itmek hemân zâtına mahsûsdur Egerçi külli zâkirdir eser feyz-i ilâhîden Muvahhiddir anın zâtı ebed hergiz karâr itmez O zikrin mevcidir envâr süzer feyz-i ilâhîden Kaçan kim bahr-ı mutlakdır bu zikrin pertevi dolsa Gelir ol zât-ı nûruna basar feyz-i ilâhîden Pes andan zât-ı nûrîde kılur tevhîdine ikrâr Hakâyık iklîmin kaplar gelür feyz-i İlâhîden Hakâyık ‘âlemi oldur kılur mevci hezârân bin Füyûz eyler ki her cinse bulur feyz-i ilâhîden Hakâyık intihâsında idindi kendüye mahbûb Habîbinden kılur her şey yazar feyz-i ilâhîden Hakâyıkda kamu insân bu tevhîdin kemâlidir Kimi mürsel kimi ekmel düzer feyz-i ilâhîden Didi ıtlâkıyetinde Hû lâ ilâhe illâ Hû Pes andan Ahmed’in zâtı olur feyz-i ilâhîden Ehadiyyetde çün didi Hû lâ ilâhe illâ Hû Hakîkat-i mürselîn anda olur feyz-i ilâhîden Didi çün vâhidiyyetde Hû lâ ilâhe illâ Hû Nebîler gayrı mürseller olur feyz-i ilâhîden Bu üç nev’-i hakîkatlar olupdur zâtına mazhar Velâkin Mustafâ ekber alur feyz-i ilâhîden Ehadiyyetde çün didiği lâ ilâhe illâ Hû Hakâyık evliyâ anda olur feyz-i ilâhîden Didi pes vâhidiyyetde ki lâ ilâhe illâ Hû Hakâyık-ı mukarrebler olur feyz-i ilâhîden Didi çün hâlıkıyyetde ki lâ ilâhe illâ Hû Pes ebrâr-ı hakâyıklar olur feyz-i ilâhîden Bu üç nev’-i hakîkatlar olupdur vechine mazhar Velâkin cümle hâlince alur feyz-i ilâhîden Kesilmez pertevi hergiz o bahrin bir nefes anla Her eşyâ her bir ism ile umar feyz-i ilâhîden Her eşyâ mevcidir anın atar deryâ-yı mutlakdan Kamu yer gök dolar eşyâ bezer feyz-i ilâhîden Yaratdı evvelâ ‘arşı ki düzdü altına kürsî Kamu gökler olup dolâb döner feyz-i ilâhîden Bilin kim bahr-ı mutlakdan bu tevhîdin kemâlâtı Zıyâ alur nücûm u şems kamer feyz-i ilâhîden Ne kim var cümle mahlûkât kamu andan alur kuvvet Melek cin div eğer şeytân beşer feyz-i ilâhîden Eğer berren eğer bahran çün anın pertevindendir Deniz ka’rındaki mahlûk kanar feyz-i ilâhîden Sehâb olur göğe ağar matar olur yere yağar Hayât bulur virür her şey semer feyz-i ilâhîden Kimin sâfî celâl eyler kimin sâfî cemâl eyler Kamusundan bulur insân doğar feyz-i ilâhîden Sekiz cennet münevverdir müzeyyendir cemâlinden Yedi tamu celâlidir kızar feyz-i ilâhîden Eğer zâhirde var dağlar eğer bâtında var bâğlar Zâhir bâtın akup çağlar sular feyz-i ilâhîden Uçan kuşlar esen yeller anın ismin okur diller Biten ezhâr u sünbüller kokar feyz-i ilâhîden Anın ismin soran kimse müsemmâdan bulur envâr Muvahhid zâkirin kalbi dolar feyz-i ilâhîden Anındır ‘izzet ü nusret hem oldur sâni’-i kudret Bu takdîri kalem levha yazar feyz-i ilâhîden Gider kış yaz olur eyyâm yağar yağmur biter en’âm Gice gündüz döner akşam seher feyz-i ilâhîden Hakâyık ilinin ismin didiler ba’zılar lâhût ‘Ammâ andan ötesidir gelür feyz-i ilâhîden Dahi andan ötesine melek mürsel nebî sığmaz Buna göre kıyâs eyle yanar feyz-i ilâhîden Anın sırrı münezzehdir ana efkâr u ‘akl irmez Liyâkatınca ‘ârifler yazar feyz-i ilâhîden Niçe bin merd-i kâmiller tamâm cehd itse bin yıllar Muhâlen-der-muhâlendir yeter feyz-i ilâhîden Sinân Ümmî bugün gavvâs olup deryâ-yı vahdetden Hakâyık bahrının dürrün dizer feyz-i ilâhîden