Guşdar Ol Huşmendim

Gûş-dâr ol hûş-mendim şerî’at akvâline “Es-sahiyyü habîbullah” bak hadîs meâline “Men yetevekkel ‘alallah” sırrına serdâr olup Bul kanâ’at kenzini yapış sehâvet dâline Fakr içinde bul gınâ müstağnî ol ey merd-i şîr Âb-ı rûyin katresin verme cihânın mâline Dergeh-i Mevlâ’ya dilden kıl münâcât arza ver Râzı ol ‘ilm-i ezelden taksîmin nevâline Bâb-ı ‘abdi dakk eden sâil olur dâim fakîr Her dü âlemde fakîrdir bak Resûl’ün kâline Sâilân meyân-ı nâsda hor hakîrdir dâimâ Kes gözün kılma nazar sen bir ehad emvâline Devlet-i dünyâ seni ta’kîb ederse sâye-veş Ol zemân ızhâr-ı ni’met et Hudâ ebdâline Zevk-ı nefsin terk ederek sor fakîrler hâlini Hayder ü Fârûk gibi bak eytâmın ahvâline Çâr civârın kıl nazar noksân-ı cîrânı gözet Allah içün nâzır ol her gün gedâlar hâline Kuş gibi derüp deşürüp kendi yavrun besleme İnsâfın vâr ise bir bak ehl-i hâl ef’âline Rağbet etmez er olan kerkes gibi bil cîfeye Ankâ-veş konar o meh-rû bir sa’âdet dâline Aç yatar çul-pûş gezer etmez tenezzül merd-i şîr Ağzını vurmaz suâlin bu zehirli bâline Pek müreccahdır yanında evliyânın Lutfiyâ Fakr ile eyler tefahhur bakmaz ednâ yâline