İsteyen Gelsün Berü

Cân u dil derdine dermân isteyen gelsün berü Künh-i zât-ı Hakk’a ‘irfân isteyen gelsün berü Ma’rifetden hissesi yok kimseye insan dimen Sûret ü ma’nâda insân isteyen gelsün berü Sırr-ı cism ü cânı idrâk itmeyen küfr içredir Zâtın idrâk ile îmân isteyen gelsün berü Mushaf-ı Hakk’dan cemâlin hem kelâmın ma’nâsı Zâhir ü bâtında Kur`ân isteyen gelsün berü Zulmet-i tâ’atda sergerdân olan sâliklere Hızr-ı vaktden âb-ı hayvân isteyen gelsün berü Sûret-i devr ile Hakk’a irmedi eflâke bak Cân u dil mülkünü devrân isteyen gelsün berü Kutb-ı mülk-i ma’rifetdir taht-ı kalbin Gaybiyâ ‘Âlem-i ma’nâda sultân isteyen gelsün berü