Muharremdir Meded Ey Dil Muharrem

Dilâ geldi yine eyyâm-ı mâtem Bu rûz-ı bî-vefâda olma hurrem Hemân hasretle kan ağla demâdem Muharremdir meded ey dil Muharrem Bugün ol bir siyeh gündür ki ey cân Şehîd oldu o “Sultân-ı Şehîdân” Bugün ehl-i muhabbet eyler efgân Muharremdir meded ey dil Muharrem Bugün derd ile devr eyler felekler Bugün hasretle âh eyler felekler Siyâh pûş oldı ashâb-ı dilekler Muharremdir meded ey dil Muharrem Hudâ ba’s eyleyüp “Cibrîl-i Emîn”i Hüseyn’in depretirken beşiğini Döküldü hâke hûn-ı nâzenîni Muharremdir meded ey dil Muharrem Sabâh-ı haşre dek Fâtıme Ana Ciğer gûşem diye başlar figâna Gözünden kanlar aksın dâne dâne Muharremdir meded ey dil Muharrem Bu ayda hâke düşdü mâh-ı enver Hafîd-i Fahr-i Âlem İbn-i Hayder Vücûd-ı nâz-perver kaldı bî-ser Muharremdir meded ey dil Muharrem Bugün la’net ile yâd it Yezîd’i Hudâ’nın düşmeni mel’ûn pelîdi Şehîd itdi dirîgâ ol sa’îdi Muharremdir meded ey dil Muharrem Dilâ Müştâk-veş biz Hayderîyiz Velî rafz u cehâletden berîyiz Ali’nin Kanber’inin çâkeriyiz Muharremdir meded ey dil Muharrem