Muharrem'dir Yine Düşdü

Muharrem’dir yine düşdü cihâna âteş-i sûzân Reh-i Âl-i Abâ’ya cân verir âşık-ı serbâzân Hüseyn-i Kerbelâ şâh-i şehâdet azm-i râh etdi Muharrem’de şehâdet şehrine şâh eyledi devrân Muharrem mâh-ı mâtemdir Habîb-i Kibriyâ ağlar Aliyye’l-Mürtezâ’nın hem ciğerleri olup büryân Hüseyn evlâd-ı Zehrâ’dır güneş-veş bir dilârâdır Hüseyn bedr-i tecellâdır olup şems ü kamer kurbân Muharrem Âl-i Zehrâ’yı edüp bir kan gülistânı Giyüp bir câme-i gülgûn şehâdetde meh-i tâbân Bugün Âl-i Abâ’ya bak cilâ verdi kızıl kanlar Düşünce hâke seyyidler kan etdi taşları mercân Bütün evlâd-ı Peygamber Hüseyn’in bâşına geldi Dediler ki aman yandık yakıldık böyle teşnegân O cedd-i pâkimiz Muhtâr-ı Mevlâ’ya niyâz eyle Niyâz eyleye Allah’a bütün yandı sabî sıbyân Hüseyn ağlar döker kan yaş dedi sabır sa’âdetdir Alî’dir sâkî-i kevser bizi gözler bugün rıdvân Kamu enbiyâ evliyâ bizi istikbâle gelmiş Cemâlin gösterir göze atar perdesini cânân Rızâ-yı Bârî ki başımıza tâc Hakk’a teslîmde Meyân-ı enbiyâda ceddimizi eyleyen şâdân Ne gelse Hazret-i Hakk’dan bize kevser-i ahmerdir Haremgâh-ı visâle vuslat olsun boynumuz al kan Muhammed Lutfî’yi yâ Rab bu hânedâna bahşeyle Gedâlarsız olur mu ya cihânda bir şeh-i devrân