Nedir

İlâhâ dü-cihân üzre bu devr iden dolâb nedir Fezâ-yı lâ-mekân üzre görünen bu serâb nedir Ki yokdur cümle varsın sen görünürsün kamu yüzden Bilinmezsin görünürken yüzündeki hicâb nedir Adı dünyâ ile ‘ukbâ iki sûretde bir ma’nâ Görünür hâbbda rü’yâ ne devre yâ bu hâb nedir Bir iken gökde vü yerde yerin yok cümle mazharda Yüzüne itdiğin yerde bu yüz türlü nikâb nedir Cihân tevhîdine dîvân suver hep sûre-i Kur`ân Okunur âyet-i bürhân ya bu ümmü’l-kitâb nedir Çıkardın Mûsâ’yı Tûr’a virüp Tevrât ile sûre Batırdın dağları nûra göremezsin hitâb nedir Sırâtın incedir kıldan günün uzun bir yıldan Ölüyü haşre dirilden suâl ile hisâb nedir Senindir dûzah u cennet olur hep cânlara minnet Nûr u yâ kürbet-i şiddet bu çekilen ‘azâb nedir Yanar kim nâr u nîrâna gezenler bâğ-ı rıdvânda Melekde cinde şeytânda bu nâm-ı bî-hisâb nedir İdersin bir iken ayru sana vâsılları yâ Hû Alırsın virdiğin girü bu sorguya cevâb nedir Revâ mı virdiğin almak zemîn-i zillete salmak Felek gibi dönek çalmak bu ef’âl-i sehâb nedir Evindir Ka’be büthâne kulun ‘âkil u dîvâne Kamu kâfir müselmâna günâh ile sevâb nedir Nedir bu kâlıb-ı insân nedir bu cân-ı nûr-efşân Dilinde sen iken mihmân bu rütbe ıztırâb nedir Celâlin tatlı sükkerden cemâlin şîr u şekkerden Gelir ikisi bir yerden bu fark-ı dil-harâb nedir Seni bilmek cemâl oldu misâlin bî-misâl oldu Yine çok kıyl ü kâl oldu nedir bu pîç u tâb nedir İlâhâ vahdetin hakdır nezâhatle muhakkakdır Ki zâtın nûr-ı mutlakdır bu sırra irtiyâb nedir Gönül seyrinde hayrândır şeb-i ıtlâka uyandır Ki öyle şevk ile yandır diyem bu âfitâb nedir Gelüp ‘aşkınla devrâne seninçün oldu dîvâne Bu Şems-i dil-perîşâne şu kıldığın ‘itâb nedir